茜廊餐廳 (德福廣場1期)

營業中

休息中

題外話/補充資料： 無光顧茜廊兩年，又裝修過，除左吊燈可見心思，每枱距離縮窄，感覺無乜私人空間。為遮掩陳舊枱布，改用一大張長方形餐紙。但枱明顯細左，理應少放枱燭，因為茜廊已經不再浪漫。 細個母親帶我食過一次，初試T骨牛排，一試難忘，要求medium well，佢真係比夠7成熟，即使之後叫medium，仍然無半點血水，而且無用鬆肉粉，厚身但軟腍，最好配黑椒汁。食完就成日嚷母親帶我黎食牛排，但9幾年至2000年初，茜廊算係中級餐廳（特別當同屬美心集團既Cellini結業之後，茜廊人流更多），所以一年去一次已經算難得。 個人覺得茜廊最出名係蒜味牛油同牛。另外，蒜蓉包經過調配而成，既有香草芝士味，同時奶味濃郁，每次遞來總係皮脆包軟，熱熱的，送湯一流。湯我鍾意酥皮湯，因為酥皮既脆又不會多油，不過酥皮過黏碗邊，難咬，湯料不足，偏鹹。所以我更多時愛飲牛尾湯，你會發現番茄令湯酸酸的，肉碎粒重牛肉味，配以薏米，不過我個人仍然愛食牛肉粒，貪其口感。 至於前菜同甜品，仍然覺得有進步空間。 飲品方面，母親一直愛飲紅莓茶，但其實近幾年我覺得只是味近藥水的紅莓汁，已沒有茶香，而且過酸而微甜，可能會讓愛飲紅莓茶既客人失望。 其實，眼見茜廊質素下降，而且侍應服務態度向來就備受批評，心裡不覺一酸。好處係德福廣場滿是貴價餐廳，茜廊以中價位質素為主打，環境方面，以前的確浪漫，而且有心，記得兩年前到此慶祝生日，侍應會捧蛋糕唱生日歌。但此情此景已逝，一去不復返。