大小姐冰室

營業中

休息中

今日試左位於炮台山既大小姐冰室，食物款式真係包羅萬有，泰國菜都可以食到。- 西班牙特濃朱古力咖啡咖啡好大杯，味道唔算太甜，上面有一層好厚既忌廉，非常邪惡🥰。- 星洲炒米上菜時不斷冒煙，證明即叫即妙，鑊氣好足夠。米粉炒得好乾身，配料好豐富有蝦、青椒、火腿，咖喱味幾香濃，味道唔算太辣，最勁係仲充滿蛋香，真係超好食👍🏻- 椒鹽豆腐一碟有超過十五粒豆腐粒，外皮香脆粉薄，炸得好香口，加埋香辣既椒鹽，令人忍唔住一口接一口。是日燉湯好有驚喜，佢唔係平時茶餐廳是日例湯，佢係真正既燉湯，味道非常鮮甜，而且好多湯渣真係落足料。大小姐冰室正正係我女友屋企樓下，而且開左幾耐，女友一直話麻麻所以我都無試。不過今次食完令我喜出望外，食物款式超級多。