町町丼丼 (濱海大廈)

營業中

休息中

星期日嘅鰂魚涌完全係另一個面貌，好多食肆都休息。我好彩喺外賣App見到「町町丼丼」有開，今晚晚餐有著落嚕☺️。小店係一間外賣店🥡，裝修簡約，而佢做到最重要嘅一點就係快捷，外賣包裝亦都穩陣企理。食物定價相宜，主食平均五十蚊有交易，喺商業區內實屬難得。壽喜燒牛肉鍋($52)，🍲壽喜燒湯幾惹味，比起其他餐廳嘅鹹，不過同時帶少少甜。湯鍋好足料，有肥牛🥩、腐皮、魚板、洋蔥同海帶等。整體質素不比日式料理店遜色。烏冬(+$4)，壽喜燒本身配飯，但我轉咗烏冬🍜，感覺更搭調。烏冬用兜裝住，唔會浸淋。大盛雙層鰻魚丼($79)，🐟雙層鰻魚夾埋有成條，自己喺超市買都唔平。鰻魚肉質唔鬆散，無乜碎骨。鰻魚汁撈飯食一流，飯係用上珍珠米，有口感🍚。玉子如果多啲就正喇。黑椒鴨胸配柚子醋($38)，🐣鴨胸肉質幾嫩，大大啖肉，啱晒食肉獸。鴨胸附上黑椒調味，另外仲有柚子醋汁沾嚟食🍊，微微酸，好醒神。唐揚炸雞配黑椒蛋黃醬($38)，🍗炸雞有成六件，炸皮唔係好脆嗰種，再加埋黑椒蛋黃醬，成個感覺有啲似麥樂雞，都唔錯。總括嚟講，食外賣都可以好繽紛，如果想食日式嘢🍱，不妨考慮町町丼丼。食物質素唔差，份量又多，係性價比之選👍。