通達食店

營業中

休息中

咖哩魚蛋，好正既咖哩魚蛋！一口氣叫四串食，每串只係 HKD7 蚊 ﹗深啡色既咖哩，既香且辣又帶甜，仲混有辣油係裡面添 ﹗香氣撲鼻，幾條街都聞得到。食落味道刺激，魚蛋口感實淨，魚肉味濃，好好味 ﹗跟細細個時食既一模一樣，依家第二間搵唔到架喇 ﹗白牛柏葉巴西牛腩幼麵咖哩汁，白柏葉都好爽口鮮味，灼一灼唔會老，正噃 ﹗巴西牛腩有別於一般車仔麵檔所用既牛腩，啖啖肉，形狀端正，炆得入味而口感彈牙又無渣，好味喎 ﹗淺黃色既咖哩汁，濃郁香甜，跟我廿幾年前童年時既味道好似 ﹗好好味 ﹗幼麵烚同剛好，不過火又嚥嚥靭靭，依個車仔麵真係好好食 ﹗好食過西貢間名店啦 ﹗原來咖哩魚蛋既咖哩跟車仔麵既咖哩唔同架，我係想撈咖哩魚蛋既咖哩架 ﹗碗仔翅，顏色真係好靚，通透帶光澤，味道香甜有肉味，夠晒濃郁，幾好味。但要趁熱食，凍左會偏咸，如果當汁撈麵會更好。