八月茶室 (新港中心)

營業中

休息中

今日去左尖沙咀新港中心嘅八月茶室食Dinner，同海港城一街之隔，但價錢相對相宜，有小菜亦有晚市套餐，平平地嘅叫個炒粉麵飯幾十蚊都可以埋到單。招牌酸菜魚（小）魚片去骨，肉質鮮嫩，湯底金黃濃郁，酸菜爽脆，仲有萵筍、雞髀菇秀珍菇、大豆芽同薯粉，吸晒湯汁精華，酸辣度啱啱好，開胃又滿足。 蜜椒薯仔牛柳粒 當日食嘅牛柳粒似係牛扒切粒，所以唔算厚切。汁比較多，蜜椒醬汁甜甜地。薯仔炸香咗，係我鍾意嘅口味。 幹鍋椰菜花 本身以為呢個係乾炒椰菜花，但上枱其實都偏向濕炒，而且仲有好多肉片，肉片同菜嘅份量可以話係平均。椰菜花爽脆，微辣惹味。 川辣辣子雞丁比起坊間食開嘅辣子雞丁，呢度嘅雞肉切得比較大件，但係就係因為咁，所以食落更加有肉汁，不過變相就冇咁吸到辣椒同花椒嘅麻香辣味，辣度適中帶麻香，而且仲有啲腰果。環境方面，茶餐廳裝修簡潔，座位舒適，地點就腳，近廣東道名店街，行街行到攰嚟食個晚飯啱晒。價錢喺尖沙咀算係經濟實惠之選。