火鍋撚 (染布房街) (已結業)

之前食串燒見到同集團嘅呢間就mark低咗要嚟試試。入鋪已到聞到浸湯底藥材味，同職員吹開水佢話浸味入晒鋪😂入座店員就會奉上調味盤，炸蒜/ 蔥花/ 辣椒、炸蒜呢啲邊少得，仲有麻醬同醬汁等等，撈完一輪對面已經揀好湯底。蜂巢豆腐白湯拼台式古早沙嗲麻辣兩款都有蜂巢豆腐、鴨血（唔夠可以追加）。白湯湯頭清甜滋補，沙嗲麻辣由店家研發，巧妙地將港式沙嗲融入台式麻辣，比一般麻辣湯更香。留意番，佢哋加湯嘅話就會加返同樣嘅湯底，咁樣味道就唔會越打越淡。平時打邊爐多數都係食墨魚滑或者蝦滑，今次見有多啲種類就叫咗瑤柱干貝滑，爽口Q彈！仲點咗黑木耳，即炸響鈴同埋炸芋件，都係食麻辣湯底吸湯汁嘅好配搭。好多配料都可以揀半份/一份，細食又想試多啲款都可以滿足到。打邊爐點少得牛肉…叫咗份大嘅火鍋撚御用手切肥牛，有啲油花。牛肉就兩邊湯底都夾。飲品有常見嘅竹蔗芋根、五花茶之外仲有沙洗冰。食到最後店員話有細杯嘅腐竹糖水沙冰送，用古代酒杯上，打卡一流。甜甜地解辣又解膩。