榮園麵家

營業中

休息中

都有幾個月冇幫襯榮園，突然之間唔記得咗佢嘅魚片定魚蛋好食啲呢？巷仔嗰陣我鍾意食魚片，但係入咗舖之後魚片好似唔係好得。是但啦，叫咗個牛筋魚片河。結論係，魚片偏厚實，似交來貨，完全不似舊時模樣，印象中，魚蛋應該好食啲。牛筋炆得夠腍入味，腩汁濃厚，不會像某些新店，花椒八角味太搶。腩汁芥蘭，正正常常，但就不會像麥文好旺角般，有「揀手油菜」的質素。唯有河粉依舊幼滑，暫時榮園仍是香港眾多魚蛋粉之中，我最鍾意的河粉。一提起榮園，好多人就會話已經唔及得喺巷仔以前咁好食，直頭差咗好多，但係我諗：依家香港嘅漁獲都差咗好多，紅衫魚大眼雞都變咗貴價魚，點可能仲要求同往日嘅味道一樣呢？何況，入咗舖之後，有冷氣，衛生環境亦同以前好唔同。有失亦有得，事過境遷，記取今日，活在當下。