西關老祖 (文苑樓)

營業中

休息中

經過渡船街係去買呢間舖頭對面嗰間麵包舖嘅，之前試過佢個瀨粉套餐，幾好味，訂埋佢個蘿蔔糕試下💪🏻呢度冇得直接叫嘢食嘅，係經過部自助點餐機，就會直接出單俾廚房，睇嚟老闆都係一個人自己睇鋪自己煮，全部都係即叫即煮嘅。嗌左個瀨粉加炸燒賣套餐，燒賣唔記得影相，但係好鍾意佢嗰啲XO醬， XO醬入邊好多料有瑤柱蝦米，食落去好惹味，正!!! 瀨粉分量好多，絕對足夠兩個女仔下午茶咁食。榨菜好入味，溝少少瀨粉食都幾特別，不過個湯底比較好結身，唔似出邊食開嘅湯底咁水。蘿蔔糕packaging好stylish，全黑嘅bubble wrap，再用瓷器盆裝住。返到屋企煎晒成底都夠四個人食。以前自己食開蘿蔔糕會點甜醬辣醬或者XO醬，但係本身呢個蘿蔔糕已經好夠味，調晒味先再去蒸，所以咩醬都唔使。煎到兩邊香香地，好惹味，而且見到好足料，有冬菇瑤柱臘腸肉粒，對於一間one man band嘅舖頭，都有咁樣嘅質素，絕對值得佩服。同老細傾開先知原來葵芳廣場都有一間分店，下次去掃街又可以試吓其他嘢啦。