點‧粵 (已結業)

鄰居兼好朋友要去加拿大移民🥲，所以約左佢係屋企附近食farewell dinner，我揀左平時我地食開既餐廳。雖然餐廳已經轉左名叫點．粵，但入面裝潢大致上一樣，食物款式一樣有我地鍾意既銀芽肉絲脆麵🥰銀芽肉絲脆麵真係食極唔厭，而且打卡一流，脆麵好似識飛天咁😱。芡汁淋係脆麵上面，令麵條又脆又軟。另外配料有豬肉絲、銀芽、菇絲等，口感豐富。職員會等我打完卡先帶我地煎開麵條，非常貼心😍懷舊蝦多士亦係平時必點食物，多士非常脆口，鮮蝦肉質彈牙，整體唔油膩😋秘製雞煲係餐廳新菜式，我哋叫咗半隻，雞件切得好細件，味道唔錯夠入味，入面仲有薯仔同洋蔥。均衡飲食好重要，所以最後叫左金銀蛋浸小棠菜，面頭好多鹹蛋黃同皮蛋粒，小棠菜好清甜。希望我同朋友既友情好似呢間餐廳一樣，雖然名字改左，但最重要嘅菜式仍然屹立不倒。到時等朋友返黎香港再食過！