青葉海鮮酒家 (昌泰街)

營業中

休息中

落荃灣攞返訂咗嘅鮑魚，跟住就近近地去呢一間飲茶。都好耐冇嚟過，原來裝修過光猛咗，冷氣凍咗。大致上八成嘅食物質素都唔差，啲韭菜餅係新鮮炸，唔似係炸定嘅，個芋角都唔會食到成口油，最難得係碟腸粉，出邊食嗰啲都係微熱，但係呢度係熱辣辣亦都唔似係返蒸過。另外其他點心都夠熱，好難得而家出街飲茶d點心係會出煙。雞絲粉卷都少見，表現都唔錯。沙薑雞腳都好腍，又夠熱。係唯獨少少失望喺個斑蘭千層糕我想像中唔係蛋糕底係甜糕。同埋自己眼殘本身想食星洲炒米，點知圈咗個豉油王炒麵，個豉油王炒麵就似粥舖炒定跟住夾俾你嗰啲。題外話，部長嘅態度都唔係太好，兩點入到去問佢有冇下午茶紙佢就皺晒眉頭大聲講話未夠鐘，一個簡單嘅問題，好唔耐煩㗎答覆，我知自己唔係熟客仔，咁唯有一笑置之。