梅花邨小館

營業中

休息中

風聞北角呢間潮州菜館「梅花邨小館」評價不錯，又近地鐵站（B4出口即見），下午又冇落場時間，就搵左個星期六下午放工去試。佢主打係滷水同小菜，最招牌菜式反而係唔多似潮州菜的沙嗲牛河（$52）。分量唔少的牛河幾乎完全被沙嗲汁覆蓋，一睇就知非常濃郁，除左沙嗲醬，仲混入左花生碎，又香又有咬口，但唔會好鹹。河粉唔會黐埋一舊舊，亦唔會碎晒，牛肉都係一般的腍，加幾條菜都唔錯，可以中和下濃味。滷水鵝片（$95）都好高質素，滷水汁算清爽，冇死鹹，鵝片不油不膩，都幾腍，墊底的豆腐吸滿滷水汁，好食。魚香炒桂花魚肚（$72）有蛋塊、魚肚、芽菜等等，口感又爽又脆又腍幾豐富，只係調味重手左少少，有點鹹。仲有好多菜式想試，下次搵多幾個fd子一齊食先。