影片
更多
2012-03-02
155 瀏覽
其實XO仔已經黎過富豪金殿食過幾次晚飯，只係一直懶惰，未有動筆去寫作食評。碰巧最近有兩位日籍朋友第一次黎香港玩，話想試下特色o既廣東菜，我第一度就諗倒要帶佢地黎富豪金殿；為左香港o既形象，小肥更悉心安排餐單！富豪金殿係酒店o既中菜廳，經三層電梯上到正門，大大張龍椅歡迎客人，好有氣勢，聽講重係旅客影相o既熱點。金殿入面，主色為金色同白色，光猛潔亮，樓面好明顯比出面高好多，間格寬敞舒適，第一步踏入去就已經好有富豪feel！另外，值得一提o既係XO同家人特別欣賞金殿內近乎零o既油煙味。埋位放好大褸，自動就會有人為外衣加套保護。茶未泡好，又會先送上熱毛巾，招呼周到，突然覺得這個冬天很溫暖。當晚所有餸菜都一早分好哂，餐具配備齊全，更衛生地每人一對公筷。 富豪推介之黑魚子凍螺片柚子軟殼蟹：第一次黎食嗰陣時，一人一杯，別緻o既presentation已教人印象難忘！今次再黎，雖然冇左隻雞尾酒杯，不過外表仍不失吸引；上餸時，日籍貴賓都不禁嘩左兩聲，當然亦不忘拍照留念啦！依道頭盤無論係味道亦或係口感都好有層次：面層o既軟殼蟹好香脆；左右護法o既美國凍螺片就鮮甜爽口，襯上帶咸o既黑魚子，感覺分外清新；底
富豪金殿係酒店o既中菜廳，經三層電梯上到正門，大大張龍椅歡迎客人，好有氣勢，聽講重係旅客影相o既熱點。金殿入面，主色為金色同白色，光猛潔亮，樓面好明顯比出面高好多，間格寬敞舒適，第一步踏入去就已經好有富豪feel！另外，值得一提o既係XO同家人特別欣賞金殿內近乎零o既油煙味。
埋位放好大褸，自動就會有人為外衣加套保護。茶未泡好，又會先送上熱毛巾，招呼周到，突然覺得這個冬天很溫暖。當晚所有餸菜都一早分好哂，餐具配備齊全，更衛生地每人一對公筷。
富豪推介之黑魚子凍螺片柚子軟殼蟹：第一次黎食嗰陣時，一人一杯，別緻o既presentation已教人印象難忘！
今次再黎，雖然冇左隻雞尾酒杯，不過外表仍不失吸引；上餸時，日籍貴賓都不禁嘩左兩聲，當然亦不忘拍照留念啦！依道頭盤無論係味道亦或係口感都好有層次：面層o既軟殼蟹好香脆；左右護法o既美國凍螺片就鮮甜爽口，襯上帶咸o既黑魚子，感覺分外清新；底層o既柚子沙律酸甜多汁又冰涼，醒神醒胃，成功為晚宴揭開完美o既序幕！
送酒推介之鎮江水晶肴肉，蒜片和牛粒，脆皮珍珠蠔：每人一份三格長碟，整潔大方得體。喺屋企食慣媽咪秘製o既肴肉，所以好難客觀地批評三小碟之一o既鎮江水晶肴肉，請大家見諒。
蒜片和牛粒中o既蒜片夠乾夠薄，香脆非常。和牛粒腍滑多汁，又有肉味，牛魔王XO仔勁鍾意！
珍珠蠔淋上七味粉，味道算小辣，最重要係炸得好乾身，而且餸如其名，一樣脆皮，送酒一流！
滋陰推介之西藏雪棗銀耳燉烏雞：個湯燉得好夠火口，而且一D都唔油膩。每碗都咁足料，烏雞好嫩滑；紅棗同烏雞依個配搭令湯味清甜香濃，真係好好味！
香醇爽滑推介之花彫乳酪大花蝦球：花彫味香醇撲鼻，未起筷已經迷倒兩位日本姑娘，更話一定要買返兩樽返日本比佢地媽咪添。主角蝦球鮮甜爽脆，伴碟o既乳酪亦不遜色，據經理Nelson哥哥解釋，乳酪係由忌廉，牛奶同蛋白溝製而成，滑溜非常，最後用花彫輕輕點綴，妙極！妙極！兩位靚女問我oishii廣東話點釋，我就教佢地用力地講：「嘩，好正呀！」既能反映我嗰一刻o既感受，依句亦係書本上學唔倒o既。
芙蓉珍珠星斑：星斑雖然香甜嫩滑，不過大家都將注意力放哂落比較得意o既珍珠度。得悉粒粒煙韌o既珍珠乃蛋白所製成，兩位美女對中國廚藝簡直係嘆為觀止呀！小弟見倒兩位女生成餐飯不斷點頭，都覺得自己冇揀錯地方。
金湯松茸片翡翠：松茸片散發出濃烈o既菌香味，大家都索返幾啖先捨得食。所謂金湯，原來係廚房用黎調味o既特濃上湯，喺金殿食所以好順理成章地叫做「金湯」。津白本身已經好夠甜，配上金湯食，味道濃得黎又唔會好似芡汁咁油膩同槳住個口，好啱唔鍾意食菜o既XO仔口味。
必吃推介之黑菌茸脆瑤稻庭冷烏冬：見倒餐牌寫住主食材為日本o既稻庭烏冬，兩位對中廚o既烹調手法都十分期待，好在富豪金殿一D都唔失禮！稻庭烏冬煮得好夠al dente（意粉最高境界之煙韌彈牙），黑菌茸清香濕潤，瑤柱超級乾脆香口，加埋蔥花一齊食，感覺清新爽涼健康，冇得彈！完美指數足以令此餸成為「我最喜愛的單尾」！連平時唔鍾意食冷麵o既爸爸都食到拍爛手掌，重食埋媽咪嗰份添，可想而知依道中日法意混血兒有幾掂！
香芒布甸鮮果甜絲絲：小肥食親芒果布甸都要加好多奶，所以今次冇奶食好似唔係好自然咁。布甸面o既炸麵粉好幼好乾身，粘上糖粉食都唔錯。
晚宴精彩程度簡直係爆哂燈！由食材o既揀選及配搭，烹調o既方式，以致賣相，睇得出師傅落左好多心機去鑽研同炮製，成功地取悅訪港以及本地o既食客，大家同樣地咁驚喜，真係好難得！喺環境高雅o既金殿品嚐殿堂級美食，睇得又食得，更受到富豪式禮待，用白金卡埋單重有八折優惠，真係抵食到極呀！
張貼
