嚟到見到過年有套餐食，但係係按位計，每位$188咁，我地一共有四位，咪嗌四位份量嘅套餐。
29
點知一上到枱，已經見中伏啦，我地四個人份量嘅滷鵝拼盤，盡然係同隔離枱三人份嘅係一樣？？？
我地即刻搵侍應嚟攞去問廚房，廚房話出錯餐，跟住求其切嚿魚片補返數，就攞返上嚟。
喂，唔係呀？畀多$188食多一個人份量，拼盤就係多嚿魚片呀？就算滷鵝唔補啦，連滷蛋都唔補多嚿呀？
於是我地去問著西裝嘅唔知係咪經理啦，攞去廚房問「你地四人份量嘅拼盤就係比三人份量嘅拼盤多嚿魚片呀？」，呢個時候廚房佬反口啦，話出嘅就係四人份量嘅餐，唔會補畀我地。
原來咁嘅玩法都得，既然四人份量套餐嘅菜量同三人份量係一個size，咁你地憑咩收我$188×4=$752？原來食嘅嘢同人地畀$188×3=$564係一樣嘅，咁你地明掠我$188咋喎。
咁我地問個唔知係咪經理嘅西裝友啦，如果第一道菜已經係咁，咁你地保唔保證到之後我地四人份量套餐上嘅菜，係應該比起隔離枱三人份量嘅多返三分之一？原來都係話保證唔到，廚房話係咁就係咁。
嘩，原來呢間店啲定價同份量冇標準架？即係要我地食客硬食啦。
最後問埋staff，如果五位、六位嚟食你地呢個三位起嘅套餐，你地係咪又諗住淨係上呢一碟拼盤打發人？又係回應唔到。
定係其實你地expect，年廿九我地一家人團團圓圓嚟食餐飯，反而應該分開兩枱食先有得唔會中你地嘅伏？
最後我地決定唔食了，你地留返個三人份量嘅套餐畀啲四人五人六人客啦。
新年流流要人地食餐咁唔開心嘅飯，最識做生意真係非你地莫屬。
