巡味 (柯士甸道) (已結業)

自從食過一次呢間茶餐廳嘅早餐，覺得佢早餐個坑紋雞扒係煎得幾香口，而且算幾大塊，仲有沙律菜，擺盆靚，食都食得開心啲。所以如果朝頭早嚟開呢頭又泊到咪錶，就會嚟呢度食早餐。講返今日個早餐，天氣凍嘅關係，想食啲好熱嘅野，所以放棄咗一心嚟食嘅雞扒，叫咗個沙嗲牛肉面配炒蛋多士，熱咖啡。沙嗲牛肉麵，好多牛肉，沙嗲汁味道唔會過咸，夠熱，麵底都煮得啱啱好。我自己唔鍾意食太濃味嘅沙嗲牛肉 ，好多茶餐廳都會整得太濃味太鹹，呢度冇呢個情況。牛肉雖然係雪藏野，起碼冇筋。炒蛋係炒滑蛋嗰種，我自己比較喜歡，唔鍾意舊式茶餐廳炒到好熟嗰種炒蛋。多士就正正常常，係兩片薄多士，不過唔鍾意佢用植物牛油，植物牛油冇牛油香味。即磨咖啡，有咖啡香味，夠濃，茶餐廳來講算係好唔錯，仲可以添飲，要比兩個like。嚟過幾次早餐，都係一樣嘅一男一女服務生，手腳快，有回應，唔會黑口黑面。總括來說，雖然食物選擇唔算話好多，歐陸早餐冇豬扒牛扒，麵包亦都冇餐包豬仔包嗰啲俾你揀，但食物質素中上，服務員態度親切，枱面有水唔洗叫又唔洗自己拎，夾夾埋埋就係會繼續幫襯。