牛角日本燒肉專門店 (德福廣場2期)

營業中

休息中

牛角燒肉放題就有食過，但外賣燒肉丼飯就唔知咩味，所以要試下。其實應該同次男坊冇乜分別，但因為我連次男坊都無食過，位置太隔涉。今次就見距離唔算遠，德福牛角都有做丼飯外賣，咪行過去買。上網預訂左先，然後到店自取，本身正正想試次男坊丼飯但諗諗下而家冇咩錢，經濟唔好，算啦揀個半價「生薑豬頸肉飯」，免費包汽水，咁我順便搭多隻溫泉蛋，都係$35.5，OK啦。真係冇咩大預期，始終劈落半價，網站張圖又顯示好似得半碗份量，味道方面都冇咩大expectation。但拎返屋企發覺飯量都唔少，有平時屋企一個飯碗多d咁上下，肉一樣唔少，有𡁻口又有豬味，唔係茶餐廳level豬頸肉，最緊要係入晒味，好好食。再撈埋醬汁同溫泉蛋，超出預期唔錯，令到我有衝動再幫襯。咁樣拎一段路程返去雖然凍左d，但個人接受到。其實一直都因為工作上既原因，唔多buy牛角成個集團做既任何舉動，但試完呢個飯就發覺，點解人地終歸正正吸引到咁多客呢？喺食物質素方面至少唔可以求其，對我黎講公關技倆都係其次。