Asiri

營業中

休息中

天氣凍咗除咗好想打邊爐之外，有日諗起好想食日本嘅湯咖喱。星期五放工嚟到鰂魚涌呢間北海道家庭式餐廳，餐廳招牌菜係北海道名物——湯咖喱。湯咖喱有幾款選擇，另外仲有咖喱飯，全部都係set，包括湯、沙律同飲品。薯仔沙律以玻璃杯上菜，賣相精緻而且味道好。小杯裝住加咗薑蓉嘅雞湯，幾暖身好適合冬天飲。等咗一陣湯咖喱就上枱，湯咖喱有多種野菜，包括南瓜、茄子、槤藕、薯仔同紅蘿蔔，好豐富。粉紅色嘅牛舌嫩滑，估唔到咁腍而且肉味濃湯咖喱雖然比一般咖喱稀，但香料味同樣濃郁一啖熱辣辣嘅咖喱湯，一啖黏糯嘅珍珠米飯，好滿足寫明係自家製嘅吉列豬扒上色均勻炸得酥脆，雖然係炸物但食落唔覺油膩豬扒肉質鮮嫩，唔會炸得過乾，估唔到咁有水準咖喱香料味突出帶微辣，唔食得辣嘅人都啱食。咖喱汁撈飯一流，而且野菜份量多，感覺健康。跟餐飲品我哋揀咗蜜桃茶，味道唔錯但比較細杯。整體嚟講食物幾有水準，湯咖喱同吉列豬扒咖喱飯都好味，味道好貼近喺日本食到嘅。其實除咗咖喱之外，都有其他選擇，下次會嚟試下其他嘢食。