鼎泰豐 (已結業)

見新港嗰邊分店長期排長龍，就走過嚟呢間試吓，諗住唔使排隊，果然由夜晚七點到十點入座率最多都係得七八成，入座之前講過既個半鐘頭趕你走嗰啲嘢，蒜狗掃把啦。四喜烤麩，勁細碟，烤麩味道亦都太甜同埋太淋。小籠包 keep 到，都係 keep 到無乜特別，皮無錯算係夠薄，但係內裏湯汁唔夠，餡料亦都唔夠味道，好懷念小揚生煎。蘿蔔絲海蜇，都係勁細碟，味道清新，喺味道上黎講都唔錯。醉雞，酒味唔濃，雞肉梅鞋，果真最雞。牛肉麵，君子清湯淡如水。另外有個無影相既紅油抄手，啲餡硬實如鋼，可幸醬汁味道還可。我地三個完美身形嘅美少女同埋兩個奀挑鬼命既小鮮肉，都總共食左三個麵，一個飯，三籠蒸野，一個湯同埋三個 “ 小 ” 碟先至覺得有少少飽，雖然咁嗌法都唔洗兩舊水一個頭，但係分左三圍用膳呢個體驗確實新奇。不得不提侍應姐姐態度殷勤，反應迅速，笑容可掬，挽回分數不少。