德興美食坊

營業中

休息中

喺新城市廣場行街行到攰攰地，行過去希爾頓嗰邊搵嘢食，想食得平啲，但係又唔想幫襯連鎖食肆。睇過幾間都唔啱，見呢間幾多人幫襯，一於就食呢間。呢間餐廳粥粉麵飯乜都有，選擇好多元化。餐廳裝修好簡單，場邊掛咗一幅好大嘅清明上河圖，更加都幾多元化，有卡位有圓枱等等。雖然已經過咗中午時間，但係呢間餐廳依然好多客人，最後都要搭枱。餐具要自己喺枱下面嘅櫃桶拎，衛生情況麻麻地，張枱啱啱有人食過都未清理乾淨。江西酸辣米線$35豬扒江西酸辣米線，好難食！無啦啦係米線上面加入一片檸檬已經好奇怪，從來未食過咁辣嘅酸辣米線，因為佢加咗好多辣油，我完全食唔到呢種辣，我最後將啲辣油過濾出嚟都係咁辣，已經唔係酸辣米線，係麻辣米線！豬扒好鞋，一啲調味都冇，食而無味，未食過咁難食嘅豬扒米線。附近食肆嘅選擇好多，其實唔一定要食呢間，更希望大家用雪亮嘅眼睛去選擇餐廳。