RBTea (已結業)

早幾日下午約左朋友仔去尖沙咀一轉，難得約左朋友仔，當然要搵個地方傾計聚一聚啦！我真係好少嚟尖沙咀都唔係好識去搵食，所以朋友仔就帶我去左一個傾計食甜品的好地方~哈哈哈...依度就係尖東新文華中心嘅RBTea，係一間新開嘅日西式餐廳嚟呀！茶室入面環境都唔錯，而且整座位都坐得好舒服呀~不過我地真係大鄉理，等左一陣先知原來店鋪係以半自助形式，而要自己去收銀處點食物及拎取餐具呀~餐牌入面啲食物都好吸引呀~由於我地兩個都唔算太餓，所以只係點左啲小吃。自行去付款後，就會有一個兔仔號碼牌，等一陣就會有店員送上食物啦~天氣熱熱地，我同朋友仔都分別點左草莓冰雪樂及芒果冰雪樂~兩杯好足料嘅果汁刨冰，再配上MOVENPICK雪糕，飲落真係涼一涼，都幾啱我倆口味，唔錯呀！香腸芝士西蘭花薄脆~我地嘅主角終於都嚟到，分別就係草莓輕食鬆餅及香蕉抹茶輕食班戟~草莓輕食鬆餅就係我倆強烈推介，因為個鬆餅即叫即焗，而且又唔會太乾或太燶，一口鬆餅加雪糕一齊食，真係非常好味呀~香蕉抹茶輕食班戟就係由三層班㦸外層抹上抹茶醬汁，再加上香蕉，既特別之餘仲幾靚添。不過我地都覺得個抹茶味唔算太突出，如果可以加多少少抹茶味，應該會更加好呀~