Paisano's Pizzeria (已結業)

由於今晚有英格蘭足總盃睇嘅關係，爹哋要返屋企睇波，所以今晚我們去咗之前都買過嚟食覺得都幾好，喺旺角登打士街嘅「Paisano's Pizzeria」買外賣自取返屋企食！我們買咗兩個M size pizza，分別係夏威夷風薄餅同烤鷄薄餅，由於係即叫即做嘅關係，店員同我們講話要等20分鐘先有，我們話好無問題，但結果等咗30分鐘先有，薄餅係厚批，質感都幾軟熟，夏威夷風嘅味道比較香甜清新，唔會有好膩嘅感覺！而烤鷄嘅味道就比較怪，肉質亦比較「粗嚡」，令我們覺得有啲失望！燒鷄香蒜蝴蝶粉嘅蝴蝶粉質感好煙煙韌韌，燒鷄嘅肉質亦都係比較「粗嚡」，醬汁嘅香草味過度濃郁！鷄寶係好似平日食開嘅「X樂鷄」咁，肉質都幾鬆軟，唔會好乾身！炸薯條炸得都幾外脆內軟，而且係粗身嘅，所以口感比較豐富！