一出電梯已經俾凡高嘅仿畫包圍，就算唔識藝術都覺得好colorful好靚。
門口仲有對鸚鵡歡迎你。
幾年冇黎，餐廳俾我感覺同之前好唔同，因為成間餐廳燈光明亮左，另外除左有更多凡高嘅仿畫之外，其中一幅牆仲畫左《夜晚露天咖啡座》嘅壁畫，鮮艷嘅色彩非常啱打卡。
就連枱上面嘅枱墊都印左凡高嘅畫作。
佢地個Ｍenu非常豐富，除左散叫，仲有好多唔同組合嘅套餐，連到會都有，套餐有平有貴，梗有一款啱心水。最後我地揀左兩個Set Dinner，套餐由$268至$378，包左前菜、餐湯、麵包、主菜、甜品同餐茶，另外仲可以加錢轉其他野飲或者甜品。
前菜 - 油潤嘅巴馬火腿配清甜哈蜜瓜，旁邊伴有新鮮沙律菜，醋汁足夠。
雜菜湯 - 餐湯係雜菜湯，唔啱飲都可以加$38轉野菌忌廉湯。
雜菜湯都幾多料，入面除左洋蔥同紅蘿蔔，仲有啲豆，唔會太酸。
餐包 - 上枱時仲係暖嘅，食落夠鬆軟。
絕炒尤物 & 莫加咖啡(跟餐加$20) - 絕妙尤物其實係水蜜桃乳酪，好香甜水蜜桃味，加埋乳酪酸甜味令人胃口大開，杯底仲有煙韌啫哩。莫加咖啡咖啡味就比較重，如果本身鍾意朱味嘅就點返淨朱古力好啲。
燒美國豬肋骨配燒烤汁($298) - 豬肋骨有兩塊，下面仲有多幾條骨，肉質軟腍唔會太乾同太痴骨，配埋甜甜地嘅燒烤汁好好食，旁邊仲有蒜蓉香草醬薯角同雜菜。
意式馬賽海鮮飯($288) - 海鮮飯上面有青口、帶子、大蝦同青紅椒，每粒飯都俾海鮮汁包住，所謂海鮮汁味道有啲似龍蝦汁，但唔會太鹹，海鮮飯口感creamy唔會太硬，入口仲非常熱辣辣。
朱古力心太軟(跟餐加$48) - 跟餐甜品係泡芙，我地就加錢轉左心太軟。
心太軟切開超流心，入面嘅朱古力醬好快就流晒出黎，心太軟唔會太乾太硬，蘸埋濃郁朱古力醬超好食，配埋雲呢拿雪糕一冷一熱超正！
焦糖燉蛋(跟餐加$38) - 另一個跟餐甜品我地就轉左要焦糖燉蛋，一份係有兩小個燉蛋。
燉蛋好香蛋味，質地唔會太實，上面個焦糖面夠晒脆，頂層放左士多啤梨同龍珠果，令賣相更吸引。
總結，熱食好夠熱辣辣，做得出色，環境方面特別鍾意佢個壁畫牆，同埋相比幾年前室內燈光較光左，打卡最啱，疫情期間，餐廳仲有定時做離子消毒，食得更放心。
