極尚大瀛喜日本料理

營業中

休息中

之前食過對呢間放題嘅印象都唔錯，隔咗咁耐menu又轉咗喇。今日最令我驚喜嘅竟然有凍冰冰嘅鮮榴槤食，好似食緊榴槤雪糕咁樣，軟綿綿，味道又香又甜，今餐我一個人應該食咗十粒以上，好滿足。放題唔少得係刺身嘅環節，新鮮嘅刺身完全冇腥味，鮮甜又彈牙，最鍾意甜蝦。鵝肝有熱同凍兩種，唔同食法，熱嘅煎得外面香脆，營造出外脆內軟嘅效果。 凍嘅配咗藍莓醬，有解滯嘅作用，入口即化，有香濃鵝肝味。豉汁鱔，出色，鱔皮彈牙，肉質爽脆。蒜蓉燒扇貝 蒜頭好惹味， 有粉絲墊底，吸曬扇貝嘅精華，另外仲有同款燒生蠔選擇。羊架肉汁豐富，唔算好騷，怕騷嘅人都食得。炸榴槤波波同香芋波波， 熱辣辣 流心效果冇得彈， 愛皮煙煙靭靭，好似食緊炸嘅湯圓，口感好特別。食物自助區仲有好多選擇提供，頭盤嘅選擇多不勝數，食幾多拎幾多，唔好做大嘥鬼。仲有熟食選擇，炒麵 避風塘瀨尿蝦…，賣相都好吸引，樣樣食是咗啲，整體味道都不錯。仲有點心，燒賣 鳳爪… 選擇多到不能盡錄。最開心嘅係有自助雪糕機，仲有無限量雪糕 雪條同自家製甜品供應，作為今餐嘅收尾，大大大滿足。