金凱小廚 (已結業)

好耐無去過冬菇亭食嘢，今日老友帶我去佢樓下間金凱小廚打邊爐。冬菇亭食嘢，真係另有一番風味同回憶！夜晚無咗鑊氣小炒，轉咗做火鍋任食。雞煲 串燒 火鍋放題套餐 $198，八點後平多$20。數一數，29款配料。 串燒類每人可揀四款☺️點咗安格斯牛柳粒串、燒蜜糖雞中翼、醬燒雞腎、蒜蓉燒生蠔、蒜蓉牛油燒扇貝，燒扇貝同生蠔大大隻，燒完仲好鮮味水潤，唔錯喎。最好食係蒲燒雞泡魚乾，份量多，又滋味。 做小食配埋飲品，nice~先嚟係雞煲，辣度可以自己選，揀咗BB辣，辣度啱啱好。 食完雞就可以加湯打邊爐，開動了~ 牛當然係必食，安格斯肩胛牛肉、安格斯牛板腱、美國牛頸牛頸脊都比預期中好，仲要叫幾多有幾多，食得晒就得喇！廣島蠔、原隻扇貝絕對合格有餘。 個人推介鯇魚片，竟然可以切到咁大塊，鮮甜又健康。疫情之下可以同老友慢慢食慢慢傾，係開心嘅。