5
呢兩日天氣話凍就凍，即刻諗起要食啲暖胃嘅嘢！荃灣呢間「至尊雲吞雞煲」我幫襯開，平日夜晚任食$188加一，而家出邊食個拉麵都百幾蚊啦，真係抵到爛！佢除咗招牌雞煲，仲有酸菜魚、花甲烤魚煲揀，今次凍凍哋，我同朋友就試咗個菜膳雞湯煲，真心正！
個煲一上枱，個藥膳香味已經湧過嚟！滾起之後，我急不及待飲咗碗湯，嘩，成個人即刻暖晒！個湯底好清甜，飲到紅棗、杞子嘅味，但唔會好重藥材味，好順喉。啲雞件份量都唔少，煮完都唔會韌，好滑溜，吸晒啲湯精華，好味！
講到醬料，佢個自助醬料區基本選擇都有，最特別嘅就係佢有個雞醬！酸酸甜甜帶少少辣，仲有蒜蓉喺裡面，點雞件食真係一流！我同你講，啲雞點咗呢個醬，成個味道昇華晒，我一個人可以KO晒煲裡面啲雞！
食完個雞煲（或者飲完個湯），就可以轉打邊爐！$188 任點，真係要食盡佢！
· 肩胛肥牛片 & 鮮牛肉：牛味夠，淥兩淥就食得，好嫩滑！
· OPPA魚板：韓國街頭風味，煙煙韌韌，好掛湯。
· 韭菜餃：隻隻都脹卜卜，韭菜餡好香。
· 邪惡公仔麵：食到最尾，點可以唔用個精華湯底淥個公仔麵！係熱量炸彈，但真係超滿足！
· 清新之選：萵筍片同蓮藕片爽脆清甜，可以平衡下。
· 索汁王：響鈴同生筋必叫！浸三秒，索滿湯汁，食落去爆湯！
· 經典搭配：午餐肉煎香少少再落煲，風味更佳。
打邊爐最驚口渴？唔使驚！佢哋啲飲品都係任飲，除咗汽水，仲有柚子蜜、檸茶、奶茶呢啲茶記飲品。食到熱辣辣，飲返杯冰凍柚子蜜，爽呀！
喺荃灣，百零蚊有交易，有個足料雞湯煲、高質肥牛、咁多款火鍋料同任飲，去邊度搵？呢度環境夠地道，好適合一班人嚟吹水打邊爐。下次轉涼，我一定再嚟encore！
