巴依餐廳

營業中

休息中

位於水街尾嘅巴依餐廳喺西環有一段日子，事關我喺佢啱啱開業嘅時候已經對佢饒有興趣，但礙於各種終於，等咗好多年終於有得拜訪。🙈記得舊時餐廳門口未係咁人聲鼎沸，喺攞咗好多年米芝蓮推薦同埋得到蔡生讚賞之後，依家要食，最好就提早一個禮拜左右book喇！Book位嘅時候職員會問你使唔使留羊腿——冇食過呢度嘅烤羊腿就唔好話自己嚟過食巴依啦，所以梗係老虎蟹都留啦🙏🏻🙏🏻當晚我只有兩位，所以有好多嘢都未有機會試。但係盡我（肚量）所能，試咗烤羊腿、苞菜、清燉羊肉湯、家常拌麵、酸奶、杏仁羊奶凍，都係有讚無彈。烤羊腿羊皮硬脆，頗有食曲奇餅嘅口感；羊肉十分嫩滑，羊羶味剛剛好，唔會太重但仍有風味，點埋啲孜然粉真係好味到會升仙，不過兩個人食真係食唔晒，如果大家多啲人食會好啲。乾煸苞菜有川菜風味，少有香港餐廳做到呢種感覺。有辣椒香氣、微嗆但不辣喉。清燉羊肉湯，湯頭清，羊羶味偏重，我個人喜歡呢個口味。家常拌麵稍顯普通。酸奶口感較稠唔太抗拒杏仁露味道嘅朋友都可以試試杏仁羊奶凍，杏仁味較出，唔係太多「羊奶」嘅味道，口感順滑。