農耕記 湖南土菜 (黃埔天地)

營業中

休息中

平時食中菜都係食開川菜、滬菜、上海菜，湖南菜就無試過，行開黃埔天地，留意到依間「農耕記湖南土菜」都幾高人氣，居然座無虛席，店員就叫我同朋友可以喺門口飲杯茶等一等，等咗一陣姐，店員已經好快手執好張枱，我同朋友一行二人都坐到張卡位，環境寬敞舒適，食完辣嘢離開嘅時候可以喺店舖門口拎粒雜錦口味薄荷糖Refresh下個口腔。*此餐廳收取加一服務費。鮑魚辣椒炒肉（單點$158），鮑魚體型迷你，大約有三十多隻，肉質彈牙，食落有少少鮮味，辣椒食落真係辣嘅，會越食越辣，不過辣度仍可接受，瘦肉食落好入味，味道香辣，白木耳口感爽脆。香芋蒸排骨（單點$98），份量多，芋頭口感綿密，味道清甜，排骨肉質肥瘦均勻，味道鹹香。泰國茉莉米飯（兩碗$24），飯粒粒粒分明，口感軟硬適中。糍粑油條（單點$39），糍粑口感軟糯，食落充滿米香，略嫌油條口感軟腍，未能做到甜品口感外脆內軟，配以黑芝麻碎、砂糖食用，味道微甜。招牌檸檬茶（單點$26），味道酸甜，飲落好清爽。茶水（兩位$16），茶包內有紅棗、杞子、桂圓、菊花，茶味濃香，味道甘甜。