新記煲仔雞粥 (已結業)

今晚早左收工，特別入元朗同媽咪食晚飯。不過媽咪有少少感冒，唔想食太heavy既野，所以我就帶佢食粥。呢間新記雞粥好出名，所以就同媽咪一齊試下。佢既格局係懷舊典型既粥店，入面都好光猛，店面唔算大。我地今晚7點前就到，所以唔洗排就直入。媽咪叫左招牌貴妃雞豬潤粥，貴妃雞好入味，咸咸地，而且足料有好多塊豬潤，另外我仲叫左蠔仔牛肉粥。蠔仔都夠鮮味同大隻，相當唔錯。除左粥之外，我地都叫左小食。海蜇手撕雞都幾大碟，如果落多少少麻油就更好味。炸豬大腸係我叫比自己食，炸得香口，而且大腸入面有少少油脂好甘香，唔係到到都食到。另外，我叫左蝦米腸粉比媽咪，清清地而且幾滑，但得一讚。買埋兩個人都係2百幾，飽到上喉嚨，好抵食，果然係元朗名物。