頂元魚蛋大王

營業中

休息中

以前呢個鋪位係一間好難食嘅茶餐廳，見佢裝修轉咗粉麵鋪頭，又係講到乜乜自製魚蛋，就姑且又入去試吓。入去見間鋪嘅樓面好擠迫，因為接近有一半位置係用來做廚房，見佢廚房有好多大型嘅爐具，所以信佢係自製魚蛋嘅。但係就真係坐得非常非常非常之唔舒服，我每一個動作，手踭都差d就嚟會撞到後面嘅食客，以後面嘅食客嘅每一個動作，手踭都會撞到我一樣！好啦，咁就叫碗淨魚蛋試吓啦。點知原來只係得魚蛋同炸魚角，係冇魚片嘅，再加多兩條菜心。先食炸魚角，嘩！啲味道濃烈到，覺得成舊炸魚角都充滿味精！咬落魚肉有啲死爽死彈嘅感覺，你懂的！到魚蛋，口感偏冧，沒有果種死爽死彈，而且調味亦無魚角咁濃，但有少少腥腥哋，可能唔夠胡椒粉辟腥，相信你懂的，但見佢嘅形狀凹凹凸凸不規則，都應該係真正嘅手打魚蛋！但無論如何，味道真係唔得。個湯都係冇乜特別，雖然係味精湯，但味精唔算濃烈，可以接受。蔥花有加芹菜，香口。整體來講，要$38一碗，真係大部份都係俾租，食物嘅質素真係完完全全俾租金比下去。論味道論價錢，真係唔想再食第二次。