夏捌月 (已結業)

今日去朗屏探個朋友，傾到差唔多食晚飯嘅時候就由佢帶路睇下附近有啲乜嘢好食。行下行下就去咗朗屏西鐵站嗰條天橋下面，有間裝修得幾精緻嘅西餐廳 。再望下個餐牌價錢都ok 就入去試下。間餐廳面積唔係好大但裝修得幾精緻。牆上好多電影嘅人物掛畫 。順便要講一下佢哋個舖門口有一條好大嘅天橋躉擋住。喺對面馬路都只係見到佢哋半間舖，離遠睇更加係差唔多遮曬成間舖。除咗裝修精緻之外，佢哋嘅餐具同埋餐牌都睇得出有花心思。我哋點咗兩個餐，元貝黑松露雜菌意大利飯同埋銀雪魚扒鮑魚意粉配忌廉汁。好快湯同埋蒜香包就上枱。佢哋嘅蒜香包上枱嘅時候仲係暖同埋脆，呢樣要讚。Risotto一向係我嘅至愛。佢哋嘅飯煮得比較淋同埋落比較多嘅汁，我就好鍾意咁嘅煮法。可能其他朋友會喜歡乾身啲都唔出奇。黑松露嘅味好出 同埋粒元貝好新鮮。銀雪魚扒煎得好香表面好脆，但裏面啲肉好滑。意大利粉亦都煮得好乾身好爽同埋冇油。總括嚟講兩個餐都係水準之作。估唔到喺公屋嘅對面天橋底下有間有水準嘅西餐廳。 如果你哋行開朗屏呢頭要嚟試試。