阿叔泰麵 (西菁街) (已結業)

呢間泰式小店想去好耐，雖然地點唔係元朗最旺嘅位置，但夜晚黎到都幾多人食，好彩咁啱都有位，唔洗等😁【牛肉船麵】$58呢個好多人都推介，食完一次都真係覺得值得推介，湯底用牛骨製成，湯底濃郁得黎唔會有好重味精嘅鹹，而且碗麵好足料，有四舊牛腩，每舊都煮得好腍、好入味，重有3粒彈牙豬肉丸，配有脆豬皮，好香口，重點係份量唔似泰國食咁樣細細碗，適合香港人嘅食量😋【燒豬頸肉飯】$58呢個豬頸肉都好有驚喜，每舊豬頸肉都燒得好靚，完全唔會好硬好乾好難咬，豬頸肉份量都幾多，配埋泰式酸汁，好開胃！【泰式玫瑰奶茶】$30泰式奶茶一向都係偏甜，呢杯都唔例外，玫瑰味偏重，茶味反而唔太濃，如果齋飲就會覺得太甜了，但配船麵食就啱啱好，食完鹹鹹地嘅船麵，飲返甜野都幾好，都值得一試。