呢間餐廳之前食過元朗分店，但原來元朗分店已經執咗，係The One 就開咗新分店。一直都好中意呢間餐廳嘅裝潢風格，食物質素又好，不過今個月做緊萬聖節主題，我都係中意平時嘅花花主題多啲😝 — — — — — — — — — — — — — — — — — — — — 講返食物： Lunch menu 有前菜、主菜、$28以下飲品 前菜：煎雞胸凱撒沙律🥗、是日餐湯 雞胸唔鞋，都煎得幾香，沙律菜都新鮮，整體都正常發揮。而餐湯係蕃茄湯，質地比較濃稠，食到粒粒蕃茄蓉。個多士好有驚喜，咬落質地煙韌。 — — — — — — — — — — — — — — — — — — — — 【醬燒豬肋骨】$178 呢個豬肋骨超出想像咁好食，肉質夠腍，都幾易切開，每一舊面頭嘅燒烤醬都好多，食落好惹味，而且份量都幾多，一個人食會超飽。 — — — — — — — — — — — — — — — — — — — — 【鮮刨意大利黑松露野菌意大利飯】$178 呢個意大利飯質地偏硬身，面頭有唔少鮮刨黑松露，以為會超濃味，估唔到又唔會太濃，同意大利飯嘅忌廉夾得啱啱好，意大利飯份量就唔算好多，配埋豬肋骨就啱啱好飽。 — — — — — — — — — — — — — — — — — — — — 整體嚟講，係一個環境靚、食物好嘅餐廳，值得同三五知己再來☺️

本身好中意食拿破崙，呢間店見過好多人介紹，加上佢嘅拿破崙曾經係世界賽得冠軍，食材由法國直送，令我更加想試吓係咪真係咁好食，小家庭食一磅就啱啱好喇！ — — — — — — — — — — — — — — — — — — — 【紅豆麻糬鮮果拿破崙】 拿破崙最重要就係個酥皮，呢間嘅酥皮好厚身，同時做到好鬆脆嘅效果，重點係有香濃牛油味，就連中間嘅忌廉都好好味，甜而不膩。配料上紅豆比較多，麻糬就唔算好多，不過都好煙韌，麻糬食落都甜甜地。整體來講，果然名不虛傳，一試難忘呀！😋

【蟹肉牛油果船】$98 牛油果好靚，熟得啱啱好，蟹肉嘅份量超多，應該落咗啲檸檬汁，食落酸酸地好清新，仲有啲青瓜粒、蟹籽，食落咬到黑芝麻，每一啖都咬到脆脆地，呢個配搭都唔錯！伴碟有沙律菜、杏仁片、三色藜麥。 — — — — — — — — — — — — — — — — — — — — 【香蒜和牛粒炒飯】$118 又係份量超多，兩個share食超級飽😂 和牛粒唔韌唔鞋，都幾有牛味，不過唔算食到好重嘅香蒜味。而炒飯都炒得粒粒分明，加入咗泡菜同雞蛋，每一啖都食到泡菜同蛋香，雖然有好多泡菜，但係唔會好辣，呢個係一個冇蒜味人但好食嘅炒飯。 — — — — — — — — — — — — — — — — — — — — +$38 餐湯、牛角包、飲品 餐湯有驚喜，西芹同蕃茄味好出，好開胃，唔會好重黑椒味、唔會好辣。牛角包就正正常常，比起一般餐廳嘅牛角包大件少少同埋好味啲。 【Hojicha Latte】 【巨峰乳酸梳打】 兩杯飲品都正常發揮。

約朋友係旺角食飯想搵間環境同食物都唔錯嘅cafe，見呢間都幾多人推介就去試試，一上去見到環境好靚，有個打卡位，重有窗邊大玻璃，環境好舒服，而且食物都好高質，好有驚喜👍🏻👍🏻 — — — — — — — — — — — — — — — — — — — — 【安格斯沙嗲牛肉片漢堡】$168 呢個鳥籠漢堡係必叫，一來打卡靚，二來味道係非常高質，本身塊安格斯牛夠厚身，啖啖牛香，加埋沙嗲牛肉片令成個漢堡更加juicy ，好好食😋 而且薯條炸得好脆，朋友都對呢個漢堡讚不絕口呀😆 — — — — — — — — — — — — — — — — — — — — 【金蒜牛油煎海蝦配鹹蛋黃忌廉手工意大利粉】$88 呢個手工意粉真係食得出同一般意粉唔同，質感比較彈牙，比平時嘅意粉粗身少少，我自己都幾鍾意呢一間嘅手工意粉，而且意粉非常掛汁，食到鹹蛋香，好creamy，蝦亦夠爽滑！ — — — — — — — — — — — — — — — — — — — — 【黃金炸軟殼蟹火箭菜手抓餅】$88 手抓餅夠酥脆，軟殼蟹超有驚喜，不單止好大隻，炸得好香脆，重點係入邊唔係空心㗎，真係食到蟹肉，真材實料，呢個非常欣賞！👍🏻 配埋火箭菜同蕃茄，中和返軟殼蟹嘅油膩感！ — — — — — — — — — — — — — — — — — — — — 【脆薯海鹽焦糖芝士梳乎厘】$88 梳乎厘賣相不但吸引，而且有空氣感，入口鬆軟，海鹽加焦糖呢個組合真係冇得頂！ — — — — — — — — — — — — — — — — — — — — 【髒髒黑糖珍珠鮮奶】跟餐+$16 呢個都係必叫，係cafe招牌飲品，啱哂打卡！中意佢唔會死甜，味道都唔錯！ 【熱紫薯鮮奶（微甜）】跟餐+$15 熱飲嚟講都算幾大杯，而且有甜度選擇，叫微甜就奶味比紫薯味重啲啲。

呢間喺荃灣嘅純白Cafe，喺出面一見到佢嘅裝修就俾佢吸引到，純白主題，配上木枱木凳，俾人一種慢活舒適嘅感覺。 — — — — — — — — — — — — — — — — — — — — 【泰式烤雞Pizza】$117 呢個pizza 係薄薄餅底，好香口好脆，食呢種Pizza就唔怕會食到濟，可以食好多件。特別值得一讚係呢個Pizza非常之足料，上面有青椒、粟米、菠蘿、雞肉粒，醬汁就以茄汁為主，重食到少少辣椒仔汁嘅味， 酸中帶點微辣，好滋味！ — — — — — — — — — — — — — — — — — — — — 【墨汁海鮮意粉】$110 每條意粉都掛滿墨汁，連d配料都沾哂墨汁，意粉配料有洋蔥、小帶子、墨魚仔、蟹籽、蜆肉，都幾多料，除左墨汁，重食到好重蒜油味，而且每一啖都咬到蟹籽爆開，好過癮。 — — — — — — — — — — — — — — — — — — — — 【Dirty】（跟餐$26) 漸變層次分明，冇飲開啡嘅朋友都覺得唔錯，啡味香濃而不澀，值得一試。 【特濃朱古力】$40 飲落夠滑，濃濃朱古力，朱古力愛好者必試！

呢間千層蛋糕真係完全比得上Lady M 呀，價錢平過佢好多！性價比極極極高，超級推介！ — — — — — — — — — — — — — — — — — — — 【抹茶流心千層蛋糕】$36 抺茶味濃，而且有回甘，中間流心超級正，面頭重有好多抹茶粉，每一啖都係濃濃嘅抹茶味，但唔會膩，抹茶控必試！！ — — — — — — — — — — — — — — — — — — — 【伯爵茶千層蛋糕】$36 呢個伯爵茶超有驚喜！食落有伯爵茶果種清香茶味，味道真係拍得住Lady M，完全係一試便愛上😍😍 — — — — — — — — — — — — — — — — — — — 結論係：我一定會回頭，試更多口味😍😍

呢間餐廳係結合左幾個韓國餐廳嘅食物，有韓國粥、炸醬麵、炸雞、烤肉、熱炒，好似去左一轉韓國咁😆 而我係為左韓國粥同炸醬麵而嚟，事關係香港好少食到呢兩樣野！一入座就會有人送上前菜。 — — — — — — — — — — — — — — — — — — — — 【炸醬麵】$78 炸醬麵份量真係超級多，份量上嚟講性價比相當高，基本上兩個人share食之後都飽左七成😂 味道都好貼近係韓國食果陣嘅味，炸醬唔算好濃味，洋蔥比較多，肉粒就少左d，最欣賞係個麵底，夠煙韌！ — — — — — — — — — — — — — — — — — — — — 【莞島鮑魚粥】$82 喜歡韓國粥唔會好稀，飯粒夠軟腍，而且粒粒分明，用釜鍋裝住啲粥，做到保暖嘅效果，每啖都熱辣辣，而鮑魚係切成小片，每啖都食到鮑魚，成個粥充滿鮮味，值得一試！😋 — — — — — — — — — — — — — — — — — — — — 【蒜香醬油炸雞】（4件） 忘記咗跟餐加幾多錢，係出自Nene Chicken 嘅炸雞，炸雞中規中矩，唔太食到蒜香味，如果醬汁可以多返d可能會好d。

呢間Cafe已經第二次嚟喇，中意佢環境舒適，Lunch Set 份量夠哂多，價錢都幾抵，重點係近我，有時想搵間價錢親民又環境好嘅Cafe食飯，呢間Cafe就係好好嘅選擇！（重可以帶埋寵物嚟呀） Lunch Set 多數係五、六十蚊一個餐，最貴都只係$98，跟餐送冷熱檸檬水/茶、橘子茉莉茶，其他正價熱飲+$17，凍飲+$20。 — — — — — — — — — — — — — — — — — — — — 之前食過佢嘅雞扒飯，今次想食下牛，就叫咗【煎蛋肉眼扒飯配迷迭香草燒汁】$98 一上碟果下真係比個份量嚇倒😮 竟然係有兩塊牛扒，重要都幾厚身，咬落去唔韌，亦唔會好重雪藏味，算係唔錯嘅肉眼扒。白飯都超級多，一個人真係食唔哂！煎蛋做到半流心效果，最中意蛋白邊邊位煎到好脆嘅感覺😆 呢個價錢，有呢個質素同份量，真係性價比幾高！ — — — — — — — — — — — — — — — — — — — 之前嚟食lunch都係以飯餐為主，原來最近出咗Special menu ，午餐都有得食意粉、Burger 、小食等。 我就叫咗個【黑松露醬配大啡菇意粉】$75 大啡菇好出色，咬落去滿滿菇汁，意粉係偏向似炒意粉嘅質感，不會過乾過油，黑松露醬嘅濃度亦恰到好處，同時食到洋蔥同菇菌香，亦有少少黑椒提升成碟意粉嘅味道，健康又飽肚嘅選擇😉 — — — — — — — — — — — — — — — — — — — 【荔枝梳打】$39 老公話呢個飲品好有驚喜，唔係人造荔枝味，飲品入面都真係有粒荔枝肉，唔係講笑，我坐對面都聞到陣荔枝味😂 【熱綠茶鮮奶】$29 綠茶同奶嚟講係偏向多奶味，入口夠滑，適合中意多奶味嘅朋友。如果中意多茶味就可能會覺得佢比較甜。 — — — — — — — — — — — — — — — — — — —

已經係十二月尾果時食，但係食物嘅味道至今仍是念念不忘😍 先講餐廳嘅環境，日式嘅裝潢，牆壁上掛住日文嘅點餐木牌，又有貝殼裝飾，以水產為主題，一入到去真係好似去咗日本咁，享受咗一頓仿日本午餐🥳 — — — — — — — — — — — — — — — — — — — — 【黑門令蟹味噌甲羅燒】$72 甲羅燒真係必食之選，有蟹肉、蟹膏、蟹籽、鵪鶉蛋、蔥花。店員未燒之前會比客人睇一睇，之後拎入去燒，燒完出嚟，將個蟹醬倒落梳打餅一齊食，嘩🤩 超正呀！濃濃嘅蟹膏味，質感夠creamy，呢份美味實在令人回味無窮！ — — — — — — — — — — — — — — — — — — — — 【炭燒安格斯牛扒定食】$188 不得不提午市嘅定食性價比好高，一個定食配有前菜、沙津、味噌湯、蒸蛋、飯，咁多嘢真係一個人都食唔哂。 講返個主食牛扒，唔好睇個樣好似乾乾地，但咬落唔會鞋口，而且有種炭燒香味，亦有牛味，點埋個汁食就好食d，份量同質素都對得住個價錢！ — — — — — — — — — — — — — — — — — — — — 【刺身定食】$188 呢個刺身定食又係性價比好高，有吞拿魚、油甘魚、三文魚、甜蝦、海膽、帶子，種類算幾多，而且件件都好肥美鮮甜😍 呢個都好推介！

餐廳就係1881果到，好彩當日天氣唔太凍，坐室外啱啱好，環境舒適，木門、吊扇都具古典舊建築風格，好適合打卡。 之前去嘅時候咁啱出緊情人節tea ，睇返人地post之前嘅tea，食物都大同小異，情人節係個盤唔同咗，送多兩粒朱古力，就算情人節之後去食，大家都可以參考下今次嘅介紹。 — — — — — — — — — — — — — — — — — — — — 【情人節下午茶】$698/2人 整體來講，鹹點好食d，煙三文魚加咗酸酸地嘅汁，幾開胃，食落亦唔會腥。魚子醬蟹餅同鮑魚酥都好食。青瓜三文治就hea 咗d，紫薯芝士撻嘅紫薯味唔算好突出。 而甜點方面，馬卡龍幾好食，士多啤梨果個好甜，食咗半個就食唔落喇！其他就正正常常。 但係個鬆餅就有少少失望，因為好乾啊🥲 整體都係一般打卡下午茶咁，食物唔會有咩驚喜，但環境真係舒服，同埋可以慢慢影相。