上海婆婆 (東港城)

營業中

休息中

上海姑娘，俾人嘅感覺系優雅高貴， 隨住年紀增長，呢種氣質依然唔會改變，而且會有內而外再到內散發出嚟。正好反映系呢間餐廳嘅菜式上面。 🍖前菜嘅小黃瓜伴海蜇同埋江南三小拼，就係優雅嘅代表。海蜇同黃瓜各有各爽脆，但係口感又渾然不同，但係唔會互相搶去對方特點，反而互相輝映突顯共同嘅長處。三小併有肴肉，醬排骨同埋烤夫。每樣嘅份量唔會太多，但足夠兩人分享。好似上海姑娘嘅溫柔，恰到好處將自己嘅長處俾你睇就好。三樣之中我最鍾意肴肉，佢上面加咗少少桂花蜜，用甜味更加突顯肴肉本身嘅鹹香。 🍖小籠包同蜜汁火方，兩樣都小巧工整，但係回味無窮。小籠包皮薄但唔散，入邊湯汁好足，火方擺盤真係放得好靚，火腿，脆響鈴，工整放好，中間仲有切到好似花咁嘅青瓜，好舒服嘅畫面。夾埋包一齊食，鬆軟嘅外皮，脆脆嘅響鈴，鹹甜分明嘅金華火腿，一啖有齊口感上嘅對比，味道上嘅層次，唔會互相爭搶，亦都絲毫唔會有違和感。 🍖砂鍋雲吞雞，熱辣辣嘅雞湯，溫和味道嘅雲吞同雞肉，仲有煲得好淋嘅娃娃菜，好有俾婆婆溫柔咁抱住嘅感覺，親切舒服，而且非常溫暖。