御來光茶社 (已結業)

前幾日趁教班前，去咗土瓜灣新落成嘅啟岸食物街，經過掛滿燈籠嘅日式商店街道，喺寧靜舒適嘅富士山Cafe - 御來光茶社，嘆個休閒下午茶，飲品款式非常多，兩款Royal Tea Signature特色芝士奶蓋都好好飲，蛋糕質量相當優質，而且價錢唔貴。紫薯芝士奶蓋外觀粉紫色非常夢幻，芝士奶蓋質感順滑，奶香濃陏，芝士獨有嘅淡淡鹹味同紫薯甜味好夾，每啖都飲到軟熟嘅紫薯粒粒。Oreo朱古力芝士奶蓋頂層帶有芝士鹹香味嘅鬆軟芝士奶蓋，入口順滑，同底層香濃朱古力奶昔嘅Oreo脆形成對比，層次豐富。Tiramisu外型似軟綿綿枕頭，面層芝士質感果然相當幼滑綿密，有獨特苦味嘅可可粉中和芝士嘅濃稠甜味同黏滑口感，飽滿嘅Baileys咖啡香味更自底層海綿蛋糕漸漸滲出，甜而不膩。Oreo芝士蛋糕上下層Oreo脆脆夾住綿密細膩嘅芝士蛋糕，每啖都有濃陏芝士味同朱古力曲奇甜味。