可可豬海南雞專門店 (寶榮大廈) (已結業)

今日要去炮台山附近做嘢，搞掂曬都已經接近 3pm，有人提議嚟呢間之前幫襯過嘅海南雞專門店買外賣。翻查返手上嘅資料，原來對上一次嚟已經係一年前嘅事，時間過得真快。無嚟咁耐，唔知菜牌有無唔同咗呢？果然加入咗幾款新菜式，除咗主打嘅椰香海南雞飯、首創嘅竹絲雞飯外，仲有黑蒜醬燒豬軟骨、宮廷藥膳湯米粉等，另外亦有小食、蔬菜及飲品等供應。點咗兩個飯，另外再加咗麻辣雞腎同菜心苗。驚嘆黑蒜醬燒豬軟骨配白飯 ($58)：豬軟骨好大件，份量都幾多，肉質非常鬆化，而且煮得好入味，加上以抗氧化能力出眾嘅黑蒜炮製，食落濃而不膩，超惹味！麻辣雞腎 (+$22) 雞腎非常爽口，麻辣汁撈得好入味，辣度亦恰好，用嚟過下口癮，挺不錯，開胃惹味。特色椰香海南雞飯 ($43) 亦保持到水準，一打開盒飯就已經聞到陣陣椰香。雞件有油光，厚肉富彈性，嫩滑有雞味，而雞皮亦爽口甘香。米飯圓潤，粒粒分明，煙韌有咬口， 配埋酸咪咪嘅蘿蔔絲吃，特別開胃。有飯梗係要有菜，盒菜心苗 ($22)  新鮮翠綠，味道鮮甜，食到菜既甜味，唔錯。