樺得園 (已結業)

好難得另一半主動提出今日去九龍城食W Burger， 雖然我哋都未曾食過，但係見網上嘅正評都唔少所以就決定入座啦未入門口已經見到出面兩張枱都坐咗客， 入到裏面就更加差唔多滿座， 眼見樓面只係得一位靚女姐姐好忙咁走嚟走去， 但係佢都好有禮貌咁招呼我哋坐低，只係同我哋講畀啲時間佢哋出菜，因為今日好多單，唔好催佢地就得！我哋就決定咗嗌龍城雞扒漢堡以及 蘑菇安格斯牛肉堡，兩客漢堡都轉咗套餐，有包埋一客小食/湯+一杯飲品，再加上一客迷你小食拼盤！其實由落單起計都唔係等咗好耐，而每一次食物上枱，侍應姐姐都講一次唔好意思，多謝你體諒。。首先講下份雞堡， 係出乎意料之外嘅好食， 尤其係雞扒嘅嫩滑程度以及調味都令到我地驚豔，我嘅另一半甚至話比起佢嗰份 蘑菇安格斯漢堡更出色 而蘑菇安格斯漢堡就稍為普通。。。另外點嘅小食拼盤亦不過不失，當中嘅雞翼味道亦十分唔錯！下次會再嚟試下其他款式嘅漢堡，希望佢亦都會有令我哋驚喜嘅表現啦！直到我哋離枱，成間餐廳都係滿座㗎， 要嚟食嘢嘅朋友仔都真係唔可以心急，要畀啲耐性等一等㗎！