蘑界野生菌石鍋雞

呢間雲南菌菇火鍋真係大開眼界！首先個高原野生菌土雞湯底一上枱就香到暈，飲落去鮮甜到不得了，完全唔係味精湯嗰種死鹹，阿Yan飲咗三碗都話要encore！ 重點推介刺身金耳菌真係第一次見菇可以當刺身食，口感爽脆得嚟帶啲清甜，點少少wasabi豉油，味道居然有啲似象拔蚌，超驚喜！仲有新一代見手青，店員好細心教我哋點淥先安全，煮夠15分鐘後食落滑溜溜，帶住陣獨特嘅木香，難怪雲南人為咗佢連命都唔要（笑）。 肉類方面，鮮鹵牛腱肉同麻醬千層肚都係必點！牛腱肉滷得入味又唔韌，千層肚吸晒菌湯嘅精華，再點埋濃郁嘅芝麻醬，食到阿Ken話要追加多份。最後仲嗌咗個，火腿野生菌炒飯，飯粒炒到乾身有鑊氣，仲有啲火腿粒同菇粒，香口到停唔到筷子！ 環境方面，成間店裝修得好有雲南風情，坐得舒服，侍應又夠細心，成日過嚟幫我哋加湯同換碟。唯一要彈嘅係鮮鹵豬耳有啲硬，可能我哋掛住影相淥耐咗。整體嚟講，兩個人食到捧住個肚走都係$500左右，喺香港食到咁高質嘅野生菌火鍋，真係好抵食！一定會再嚟試其他季節限定嘅菌菇！