不倒翁中日火鍋料理

營業中

休息中

最近去咗佐敦一間海鮮火鍋專門店，整體感覺幾唔錯仲幾抵食，四個人食，叫咗一個$1080二人套餐再追加啲配菜，食到頂住個肚走。揀嘢食之前首先叫咗開胃清涼酸梅湯，酸酸甜甜，非常好飲。湯底揀咗冬瓜瑤柱鍋，清清地又健康，又唔驚搶曬海鮮啲味。先嚟刺身魚生拼盤，有十件三文魚、章魚同希靈魚，幾高質，新鮮美味。然後就係海鮮火鍋配料，我哋揀咗澳洲帶子片，輕輕擺落火鍋淥一淥就食得，好鮮甜。生猛海中蝦，超新鮮，上菜嘅時候隻蝦仲識郁㗎！頂級雪花肥牛，油脂分佈得幾均勻，夠哂肥美食落去好滿足。金菇肥牛卷，第一次用邊爐方法煮熟，幾平日煎嘅煮法清新健康。汕頭牛丸，牛味夠重。手打蝦滑，鮮味十足，份量都好足夠。我哋追加咗美國桶蠔，好多粒仲好大隻，全部都好好肉地。鎮店水餃皇，係一大亮點，真係好足料，啖啖蝦肉，包到脹卜卜。我哋仲叫咗娃娃菜、爽口嘅萵筍片、翠綠嘅油麥菜，減輕下罪惡感。最後仲有甜品椰子糕同埋杞子糕。