佢要上一層先到,樓下有個接待員同d menu, 咁我地都好穩陣, 望下menu望下價錢, 咦, 幾抵食, 同埋有d似和民食既野
於是我地就充滿期待咁上去, 呢個時候大概係7:15pm。上到去, 只坐滿3成, 心諗, 應該冇咩人識喎呢間野,我地話, 唔知係咪屈左入黎d人見唔到呢? 其實黎呢度勁方便, 佐敦裕華國貨個出口向返油麻地方向行3,4分鐘就已經見到。
好, 講下環境先, 可能新新地既關係, 都幾舒服同乾淨, 以木色為主, 簡單得黎都好有日式餐廳既風味, 餐廳都算大, 我估都坐到30枱人, 而每張枱都有一定距離, 算係寬敞。
嘩, 扛開餐牌, 超多選擇, 睇到我眼花撩亂, 又心思思樣樣都想試,當然都要睇朋友食咩, 因為我唔食魚生, 佢地全部都食, 所以生熟食物都可以叫哂
由於相片數目有限,只可以upload住咁多先, 呢度只係一半都唔夠既menu, 實在係太多選擇啦, 值得一提係, 相片同事實相乎! 都係咁大份!
呢個海膽刺身唔講得笑, 好新鮮, 仲要咁大板都係$118!! 抵到丫!
七味軟殼蟹飯卷 $48, 價錢係平, 不過個蟹可以脆少少會更好, 味道係唔錯, 唔使點鼓油都夠味!
炭火燒河豚干$32, 呢個我去親食日本野都會叫, 所以我要求都好高, 份量雖然夠多, 算抵食, 不過有dd 硬, 但味道還是不錯, 如果再多d蜜糖就更好。
芝士鐵板燒豆腐$46, 一見到個賣相就知道有幾咁多芝士, 係我最愛! 唔好以為好漏, 呢個唔會, 佢同豆腐配合得好好, 中間好juicy, 唔會焗到乾爭爭, 正!
牛舌$38, 豬頸肉$28, 呢2樣野又係我平時去食串燒必叫, 而呢度整得未算最好, 但都已經好唔錯, 豬頸肉夠淋, 牛舌一d都唔韌, 厚切, 燒得剛剛好!
鐵板牛柳粒粒燒$55, 一上桌已經聞到陣陣香味, 熱速辣即刻食, 正, 煮得岩岩好, 唔會太熟, 燒汁有d 甜甜地, 係日本燒汁果d, 中間仲有一大舊薯蓉, 超抵食!我地其實仲食左好幾樣其他野,不過今次寫住咁多先。最近, 更係唔少得甜品, menu有好多雪芭揀, 但得返蘋果雪芭, $42, 以價錢黎講, 唔算貴, 其實我地原本想點椰子的, 唔緊要啦, 下次再食。講返呢個雪芭, 其實唔太夠蘋果味, 雪同冰比果肉多好多, 但口感都叫唔錯, 同埋有d 解膩既感覺, 食完, 口腔清新左
總括黎講, 呢間和食屋十分值得推介, 性價比極高, 食物質素屬中上, 而價錢算係偏平, 希望佢唔好加價啦!
我仲要黎食多幾次! 呢度既可以同家人開餐又可以同朋友聚會! 仲要唔食生野都大把野揀!!
噢, 如果遲過7.30pm先去,建議先訂位, 因為8點左右已經住滿哂人!
