海洋超級漁港 (深海龍躉專門店)

前排同屋企去咗佐敦食飯，餐廳食物質素唔錯，佢哋會提供免費嘅前菜花生同埋甜品紅豆沙，食到好滿足。而且係正地鐵站隔離，位置夠方便，值得推介。

脆皮南乳吊燒雞

一坐低即刻叫咗脆皮南乳吊燒雞，餐廳做緊優惠，半隻都只係38蚊！雞皮好脆，而肉質肥美嫩滑，高質又抵食。

脆皮燒鵝拼化皮乳豬

脆皮燒鵝拼化皮乳豬，呢個組合真係太正，可以一次過食曬我最鍾意嘅兩款燒味。燒鵝皮烤得夠香口，咬落油脂感十足，乳豬皮則非常香脆，肥而不膩。

紅酒燴牛尾煲

紅酒燴牛尾煲，牛尾同蘿蔔都煮到好入味。而且夠哂足料，牛尾多到差啲食唔哂。

日式海皇什菜煲

日式海皇什菜煲，海鮮種類好多，有魷魚、蝦、蚌，加埋唔同嘅蔬菜同粉絲，味道清清地又好健康。

海洋極品海鮮粒炒飯

海洋極品海鮮粒炒飯，炒得好出色，粒粒分明。種類又夠多，配合埋菜粒，口感好豐富。

1

翠塘香滑豆腐

翠塘香滑豆腐，豆腐好滑，食落去甜甜哋有啲似豆腐花，幾啱送飯食。

紅豆沙

除咗紅豆沙，我哋仲叫咗飲茶時候最鍾意嘅養顏紅棗糕同埋杞子桂花糕。

杞子桂花糕、養顏紅棗糕

清清地又唔會太甜，仲可以養顏。