影片
更多
2020-09-27
1516 瀏覽
好耐冇食廚師發板，朋友極力推介呢間位於銅鑼灣嘅雲壽司，由前米芝蓮餐廳班底主理，門面冇浮誇吸睛嘅裝潢，走嘅係年輕平民路線。廚師發辦menu有三款選擇，分別係吟、雲同翔，價錢親民，我哋揀咗入門級別嘅翔，包十件壽司、一件手卷同一碗麵豉湯。舖頭面積唔大，大概只可以容納五至六枱客，但優點係全部都係吧枱，面向開放式廚房，可以欣賞到師傅嘅手藝。今日師傅為我哋準備嘅壽司有象拔蚌、赤貝、牡丹蝦、深海池魚、海膽、筋子、銀鱈魚、拖羅、左口魚同金目鯛壽司。赤貝肥大肉厚，口感爽脆，食落有淡淡嘅海水味，令鮮味更突出。象拔蚌色澤雪白，口感緊緻結實，帶少少脆口，味道鮮甜。 牡丹蝦大大隻，肉質彈牙，一啲腥味都冇，味道甘甜濃郁，餘味悠長。左口魚炙燒後更加美味，入口即溶，魚油滲哂出嚟，滿口甘香。筋子係未去除卵巢薄膜嘅三文魚子，粒粒晶瑩剔透，入口有好鮮濃嘅鹹香，每一粒都脆卜卜，喺口腔入面鮮味大爆發！一坐低已經見到櫥窗入面有一整板嘅北海道海膽，極度期待，師傅亦非常大方，一件海膽壽司用上六到七片海膽，層層堆疊，夾起嘅時候要格外小心。海膽質地豐腴，入口係滿滿嘅甘甜滋味，令人回味無窮！拖羅油脂豐富而且分佈均勻，質感軟腍冇筋，入口即溶
好耐冇食廚師發板，朋友極力推介呢間位於銅鑼灣嘅雲壽司，由前米芝蓮餐廳班底主理，門面冇浮誇吸睛嘅裝潢，走嘅係年輕平民路線。
廚師發辦menu有三款選擇，分別係吟、雲同翔，價錢親民，我哋揀咗入門級別嘅翔，包十件壽司、一件手卷同一碗麵豉湯。
翔
$380
25 瀏覽
0 讚好
0 留言
舖頭面積唔大，大概只可以容納五至六枱客，但優點係全部都係吧枱，面向開放式廚房，可以欣賞到師傅嘅手藝。今日師傅為我哋準備嘅壽司有象拔蚌、赤貝、牡丹蝦、深海池魚、海膽、筋子、銀鱈魚、拖羅、左口魚同金目鯛壽司。
赤貝肥大肉厚，口感爽脆，食落有淡淡嘅海水味，令鮮味更突出。
象拔蚌色澤雪白，口感緊緻結實，帶少少脆口，味道鮮甜。
牡丹蝦大大隻，肉質彈牙，一啲腥味都冇，味道甘甜濃郁，餘味悠長。
左口魚炙燒後更加美味，入口即溶，魚油滲哂出嚟，滿口甘香。
筋子係未去除卵巢薄膜嘅三文魚子，粒粒晶瑩剔透，入口有好鮮濃嘅鹹香，每一粒都脆卜卜，喺口腔入面鮮味大爆發！
一坐低已經見到櫥窗入面有一整板嘅北海道海膽，極度期待，師傅亦非常大方，一件海膽壽司用上六到七片海膽，層層堆疊，夾起嘅時候要格外小心。海膽質地豐腴，入口係滿滿嘅甘甜滋味，令人回味無窮！
拖羅油脂豐富而且分佈均勻，質感軟腍冇筋，入口即溶，味道濃厚。
食完拖羅唔夠喉，仲有蔥呑手卷，新鮮即製，紫菜仲脆卜卜，鮮美嘅吞拿魚腩配上清新嘅蔥花同香口嘅白芝麻，完美配搭。
食完咁多款美味嘅壽司之後，飲返一碗熱辣辣嘅麵豉湯暖胃，係最好不過嘅選擇。廚師發辦一向俾人嘅感覺都係富人嘅玩意，講求優質嘅視覺同味覺享受，近年來多咗唔少餐廳轉行平民路線，令人意識到享用美食都可以豐儉由人，脫去華麗嘅包裝，反而能夠帶俾食客更真實嘅體驗。餐廳俾人嘅感覺低調，但質素絕對唔差，仲令人喜出望外，今時今日能夠用咁相宜嘅價錢食到咁優質嘅食材，夫復何求？
張貼
