Table

營業中

休息中

喺黃竹坑返工咁多年，終於最近黃竹坑開咗個新商場，我哋一班同事終於食晏嘅時候有多啲選擇喇，唔使再嗌工廈食堂或者熟食中心，因為天時暑熱真係好難頂，所以呢個商場，我哋真係期待已久。今次講呢間餐廳，我真係行咗幾次先搵到佢，因為佢喺個商場外面，無啦啦真係唔會點樣見到佢，只係有一次喺上面食完晏，諗住行出去「呼吸一下」，俾我知道佢嘅存在，跟住隔幾日再同啲同事過嚟食晏晝（因為冇諗過佢會值得我影相，下次再嚟食晏晝影相再出post），覺得佢幾正，所以今日特登過嚟試吓佢個早餐。想知一間茶餐廳掂唔掂， 就一定係試吓佢過沙嗲牛肉麵。佢個沙嗲牛肉麵唔會得個咸字，有沙嗲香味，少少辣，好惹味，值得一提，佢個公仔麵錄得幾好，唔會太過硬，但係又唔會一pat嘢咁。至於環境方面，冷氣夠，呢一點真係好重要，入到去完全唔似茶餐廳，個環境我仲諗住嗌個all day Breakfast　添，佢裝修成好似一間Cafe咁樣，坐得好舒服，好抵讚！黃竹坑終於有一間似樣嘅茶記，對於喺度返工嘅人嚟講，真係一件好事，更加開心嘅就係，終於有一間有誠意嘅茶記喇，下次再去食晏，再為大家報道！