K Chef Story

營業中

休息中

最近忙到癡哂線，唔好話屋企煮，連出去食都無時間。🥲出開屯門市中心做野，見到個螢幕menu有泡菜飯卷同炸雞嘅韓式餐廳，我即刻狗衝去買外賣！！！店員同廚房都係韓國人，識簡單嘅廣東話，由韓國人主理嘅餐廳，直覺係比較好食嘅😂😂咁我叫咗三樣野食。黃金蜜糖無骨炸雞（全隻），kimchi煎餅，芝士紫菜飯卷。一見佢拎個外賣袋出嚟，忍唔住嘩一聲，金色好靚，連個炸雞都有特別嘅紙盒裝住，好搶眼😂返屋企果陣經過七仔買野飲，店員姐姐都聞到炸雞嘅香味，眼甘甘望住我個金色袋問邊到買，猛話好香😂😂黃金蜜糖無骨炸雞（全隻）返到去都差唔多隔咗一個鐘，打開紙盒，一大盒炸雞仲熱㗎，同埋好香，金色嘅外賣袋應該係鋁紙嚟，有好好嘅保溫作用。蜜糖味嘅炸雞好好食呀，啖啖肉無骨真係一流。kimchi煎餅 食落幾驚喜，泡菜量好多，唔會食落成口餅咁，而且泡菜微辣，幾開胃。芝士紫菜飯卷 好長一條嘅飯卷！入面算好足料呀，芝士配搭上滿滿蔬菜嘅紫菜飯卷，食落口感比較清爽，唔會好膩。原本望menu仲有唔少韓式便當睇落都好吸引，不過留返下次得閒d先，有時間堂食我會再去試。