亞萊泰 (淘大商場3期) (已結業)

好耐無約朋友出街食晚飯，今晚放工就去近近地嘅淘大食泰菜，之前食過午餐唔錯，所以encore食晚餐!一坐低就送你一碟蝦片，俾你邊食邊揀嘢食! 我本身唔太食得辣，但又幾鍾意食咖哩，今次叫咗個椰香青咖哩牛腩，都比我想像中辣，但尚可接受，咖哩好香，牛腩都好腍，我哋另叫咗蒜蓉包襯咖哩食，蒜蓉包非常脆口，淡淡蒜香，又唔會太濃，味道剛剛好! 沙嗲串燒係我另一至愛，4串串燒可選雞豬各2串，十分欣賞豬肉串，肥瘦肉各一半，同五花腩一樣，好好口感，加埋個沙嗲汁味道非常唔錯! 食泰菜最愛咸魚炒椰菜苗，平時自己較少機會食，不過通常出面都得咸魚香，好少真係有粒粒咸魚，今次終於唔一樣，咸魚竟然多到食唔哂，真係勁正! 另外都叫咗個細嘅小食拼盤，有春卷、蝦餅、魚餅同鳳凰丸，蝦餅外脆內爽，魚餅香料味濃，個人就麻麻喜歡! 飲品方面，我當然飲我最愛嘅椰青，椰子肉勁好味，朋友叫咗個龍眼冰，超多龍眼肉，好味!