陞記刀削麵

營業中

休息中

陪朋友去了深水埗買電腦用品，之後順便食埋飯先返屋企，兩個人揀了間比較抵食的刀削麵店。枱面放了酸蘿蔔，十分開胃。麻辣熱拌刀削麵套餐，本身已包了青瓜絲、胡麻醬及四川擔擔醬，另外加了個豬軟骨做餸，豬軟骨炆得又腍又入味，刀削麵麵質煙韌有咬口，而且帶點麻辣香味。另外加了份一人小食，麻辣手撕雞份量十足，雞肉下面墊上青瓜，帶辣之餘又有點清爽。朋友要了紅油糖心蛋牛腱花生刀削麵套餐加豬腸，要了中辣，辣度可以接受，牛腱夠腍，豬腸略有咬口，麵及餸的份量都十足，十分夠飽。涼拌萵筍爽口帶麻辣香。