馬辣台式鴛鴦火鍋 (創興廣場)

營業中

休息中

平時食開日式放題，食黎食去都係個幾間無咩新意，今次有友人指點帶我去呢間台式火鍋任食舖，黎個新體驗。餐廳座位好夠闊落，走廊同座位都有足夠空間走動，俾食客可以舒舒服服咁行出行入夾野食。餐廳設計裝潢亦十分獨特，將自助bar設計成台灣火車，十足十去左九份十份咁，台灣情懷認真濃厚。放眼望去，自助bar可供自行挑選嘅火鍋料應有盡有，仲有專人定時定候送上補給，保證夠曬新鮮。餐廳亦十分貼心，除左一般飲品之外仲有涼茶，消暑得黎解火鍋既熱氣。湯底可選兩款，我地揀左麻辣湯底同芫茜皮蛋，另外肉類係任點既，我地主要試牛、豬。兩種湯底味道亦好濃郁，有辣有唔辣，岩曬食唔到辣既朋友仔；最值得嘉許既，係湯底料好足，湯底絕非水賴賴既感覺，豐富既湯底味令人愛不釋手，忍唔住開動！睇下幾豐盛，有各式各樣既火鍋料，仲洗得非常乾淨，令食客好放心。肉類亦好新鮮，厚薄度剛好，一落鍋無耐就食得，認真夠鮮味。最後仲食左個蜂蜜味gelato，估佢唔到係出奇地好食，唔會太甜，罪惡感都少啲！同場加映仲有dreyers雪糕，非常高質。