錦麗 (創紀之城五期(apm))

營業中

休息中

第二次來錦麗， 五點半開店5點20分已經開始排隊 , 真係唔知點解咁多人排隊, 其實而家香港有好多好食嘅越南餐廳，絕對唔使揀呢間。上次去食，啲牛肉好乾好柴，諗住畀多次機會佢，點知都係咁。 生熟牛河入面既熟牛肉直情係乾到好似華園牛肉乾咁，一絲絲好硬咬到牙骹軟。 我真係未食過咁瘦嘅牛肉越南河粉。生牛肉唔係平時嗰啲火鍋肥牛， 而係切細咗嘅牛肉，冇乜牛肉味， 而且好鞋。唯一ok嘅地方就係佢啲牛肉湯味濃而不太鹹。 另外芽菜同埋香葉好新鮮， 而且可以添加 。今次除咗牛肉河，仲嗌咗個好似台灣碗粿嘅米糕。佢比碗粿煙韌少少，但就冇乜米嘅香味，主要係靠魚露同花生碎先有味。雖然味道不太特別，但幾地道，亦較少地方有得食。嗌咗杯凍嘅滴滴越南咖啡。ok，不過同一般越南咖啡一樣都係偏甜。