霸王川莊 (已結業)

來到元朗Yoho搵食，選左呢間食四川菜的餐廳。本來約好左其他兩個朋友一齊來食水煮魚，但因為其中一個朋友爽約，淨底我同朋友二人驚食唔曬一碟水煮魚，就叫左其他四樣菜式來試試。在開胃菜方面，叫左一碟酸辣土豆絲，意想唔到既係呢碟土豆絲竟然係我地叫既食物入面最辣的。食酸辣土豆絲最怕只一味食到酸味，但呢碟土豆絲都算唔錯，酸中帶辣，因為份量唔算大，夾下夾下好快就食曬。至於個四川擔擔麵就正正常常，不過不失。另外都叫左一個我最愛的紅油鍾水餃，它的醬汁辣中帶甜，對於唔係太食得辣的朋友來講都可以接受。最後上菜的係店鋪其中之一的推薦 － 霸王辣子雞，上菜用的碟係好似鐵摌咁樣，都幾得意，這碟菜份量都係唔算大，辣子雞炸得都可口，雞肉唔會話炸完好「孩」身。整體而言，食物水準都中上，對於鍾意食辣的我來講都可以搵到食辣的快感。四碟餸最後埋單大約三百幾，算係少貴，不過能夠係香港搵到食川菜既餐廳其實唔多，所以有機會都會再來食下佢地最出名的水煮魚。