新泰東南亞餐廳 (馬鞍山廣場)

營業中

休息中

屯馬線開通左，去沙田交通方便好多，今日就同老公去馬鞍山廣場行吓，經過2樓見到新泰東南亞餐廳，原來呢度都有分店，之前係其他分店食過都唔錯，今晚就試吓呢間分店先！餐廳裝修雅致，座位寬敞舒適。串燒雞、豬沙嗲：串燒有豬、牛、雞 ，可以自由配搭。雞肉燒得腍身，肉質滑溜。豬肉亦嫩滑，兩樣都好入味，比唔少泰國菜嘅串燒出色。我最愛嘅係佢哋嘅沙嗲醬汁，調得夠惹味！鐵板蠔仔炒蛋：滑蛋包住粒粒飽滿既蠔仔煎，蛋煎得香口，蠔仔清洗得好乾淨，無雜質、無腥味，重有蠔嘅鮮味，用鐵板奉上特別有風味。泰式濕炒海鮮河：賣相吸引，河粉炒得夠鑊氣，海鮮分量亦不少，魷魚、鮮蝦、青口等樣樣都好新鮮，鮮甜爽口，再加上濃濃的獻汁，河粉口感Q軟，吸收醬汁後，一入口就令人回味無窮。