叉燒大王

營業中

休息中

呢度嘅門口長期都保持住咁有人氣，相信同佢哋嘅嘢食有莫大嘅關係。冬瓜盅，冬瓜盅材料豐富，特別鍾意佢加咗啲勝瓜粒同埋蝦，啲蝦嘅件頭都唔細，隻隻都爽口彈牙，用啲豬展嚟點一點啲豉油，又多咗一碟餸食。叉燒，呢度嘅叉燒認真正到飛天，叉燒加埋蜜汁嘅味道，本身已經完全唔使講嘢，最啜核嘅係佢個口感，好少地方有咁軟熟嘅叉燒，仲要兩分肥八分瘦，喺其他地方可能會覺得唔夠肥，但係呢度咁軟熟嘅口感，令每一啖都好似食緊肥膏咁正。頭抽雞，頭抽嘅味道入哂落隻雞度，就算怕肥嘅女士唔想連皮食都咁滋味，雞肉嫩滑，但係又唔會話太生，啲骨位完全無血，喺碟邊有更加入味嘅雞腎同埋雞潤，係用到新鮮雞嘅證明。蒜蓉粉絲蒸蟶子，啲生熟蒜同埋香蔥鋪天蓋地咁樣覆蓋住啲蟶子，一擺上枱即刻香噴噴，蟶子極度新鮮，肉質爽口彈牙，任憑啲生熟蒜再多都遮掩唔到佢本身嘅鮮甜味，食哂隻蟶子之後再舐埋啲粉絲就係食蟶子嘅最高境界喇。石鍋生啫通菜，個通菜煲擺上枱嗰陣吱吱聲，非常誘人， 跟住就聞到煲入面嗰陣撲鼻嘅鹹香味，由於係用個煲嚟上嘅關係，食到最後一條菜都仲保持到少少溫暖，抵讚。