江記

營業中

休息中

依家熟食市場買少見少，趁天氣未熱前，本來想去前排雜誌介紹嘅米線鋪朝聖，不過，佢都係冇開門。行吓行吓，我被江記檔口嗰個甚有氣勢嘅紅色大字牌匾吸引左。平時茶樓飲茶，我可以一個人食晒成碟鳳爪，係典型嘅鳳爪癡。今次我就嗌左一碗鳳爪雲吞麵。鳳爪煮得非常入味，又夠腍，腍到應該冇牙都食到。上海菜肉雲吞味道就冇乜驚喜，不過，我幾鍾意佢夠細細粒，一啖就可以吞晒。麵底係比較少有嘅上海幼麵，極之煙韌，難得冇鹼水味。麵配有雪菜，啲雪菜唔會太咸。值得一提嘅係，一路食，一路感覺到嗰種小店嘅人情味。阿姐同好多食客都有講有笑。至於我呢啲新丁食客，阿姐都好熱情咁招待。阿姐好細心咁講解大碗同小碗有幾大分別，又教我點樣可以叫餐牌以外啲雙拼呀，幾拼嘅配搭。